اللقجة .. ************ زجل للزجال إدريس بلعطار

العين سليمة ..والشوفة راها تخدع
كيف السراب يشوفو العطشان مرجة ..

شحال من دزة م لبعد تبان سبع
وعند القرب ياوعدي تصيبها نعجة ..

وشحال من ملخة على كلخة يتجدع
واخرين يكولوا : ها علامنا جا ..

سحساحة ولحلا حة محركهم اطمع
وعيونهم تزغلل إلا شافت اللقجة ..

يسقوك حلاوة لسان فكيسان تلمع
ويدسوا ف كيعانها سم الرهجة ..

والخير ف ذ الناس ماعاد اليوم يشفع
حيث الصدق سماوه الطريق العوجا ..

والمعقول نخلوه كالوا مافيه نفع
والحق باعوه ف سوق الباطل كرجة ..

والعام اللي تكول الفساد جدرو تكلع
ايجيك من يزيد ف سلالمو درجة ..