من أزجال الزجال نور الدين بن خديجة

القلب ضعيف

والشوارع سخفانة ..

والوقت قصيف

دوخاتو سخانة ..

والحب لطيف

لكن الناس زعفانة ..

****

الكانة ولات بفلوس

والناس زربانة ..

لهط الحال

ولهط المال

ضاعت لنفوس

ف اوهام فتانة ..

شاري وبايع

بايع وطايع

ترونات الطبايع

وعمت لجهالة  ..

****

ولو احتلوا المنصات

ودكوا فيها لوتاد ..

الكلمة الحرة جمرة

وراقدة تحت الرماد ..

هذ الليل ولو طول

وتاهت ف لبهيم نجومو ..

على فجرو لابد معول

والنور يطلق سهومو ..

آجيوا نعاودو لحساب

ونفهموها كيف اللي داز ..

الدورة دايرة بعطاب

واش لغزال تمشي بمنغاز ..

واش لحمير تتبورد

ولخيل محبوسة ف قفاز ..

                                    زجل : محمد نور الدين بن خديجة

                                                    2 شتنبر سنة 2013