قبيلتنا وحكام الصندوق… زجل :إدريس البوكيلي الحسني.

0 160

 راه الحفنة تتصغار 
 راه البقشيش تيصفر 
 مال المزلوط ما يهدر 
 الطنجرة والكميله 
 راه خواوها مسكينه 
 غير الهم والفرشي 
 غير الزلط وقلة الشي 
 فين العصيدة والخردوله
 فين الطناجر المتقونه 
 حريرتها ولات قليله
 زلايفها خاوية معفونه
 قوامها حدجة مثموره 
 نزالة قبيلتنا مهمومه
 القبيلة إحكمها صندوق براني
 جايب الزلط والطز فسفينه
 زمانها فالعجب راكد
 كرش الراهن ما تعمر
 والقلب الصغير ما يكبر 
 تفو تفو على الصبر
 فين الطناجي والمرقه
 راه الخير ولا بصقه
 أخيي راه خوات الكشينه
 راه ثقابيها محلوله
 سوارتها فكروش لحرام
 غير دور أوسير لقدام 
 هذا هبال هذا حماق 
 ما تغر بفياق
 ما تخدع بزواق
 راه الكلاب تصول جاهله
 كرادها عمر لمدينه
 ياك الحكرة باللجام سخونه
 والكتاب سطورو مرقونه
 الدوام لله آرسي
 شحال من فرك إقاسي
 الدوام زبدة وسراب
 ياك فاهم الزمان صعاب
 الصندوق إشد رحاتو
 راه كثرة الطمع عماتو

                                
قد يعجبك ايضا

اترك رد