الطباشير دوبنا وداب ..
لمحبة رشات حروفها ع لكتاب ..
ايام اداتنا
واعوام جابتنا
وبفينا مداد سايل بلعطاب ..
نبغي نرجع
ترجع بي ليام
ف صباح غناه راديو قديم
نشم ريحة الخالة والجارة
تايه بين جلابة ونكاب ..
يا طفل صغير
بشكارة فيها مصحف يسبح
وتلاوة تسول
وترد لجواب ..
واه ياشوق بكاه جراح
ع لخدود
واه يادمع شاخ
وشيب النظرة ع لهذاب ..
كرسيك الراشي باقي يتسناك
والساحة على ناقوس لعمر ترقص
باقي لعمر يتمنى
يتوهم يبغي يجري
ويجري ورا الريح ..
ورا جرادة
وينقز حيوط لعكز
ويطيح ..
يوقف يجري
يسبق ظلو
يدير لقصبة لخيال سبة
واسباب ..
يطيح تتجرح ايامو
تتكسر جناح احلامو
ينادي بلحزان :
يا عمري ياشماتة
يا كذاب ..
الطباشير دوبنا وداب ..
شحال كان صباحنا زين
من دريبة لحومة
لزنقة لباب ..
الطباشير كتبنا ومحانا
ومحينا تخربيشة ايامنا
ونسينا محبرتنا خاوية
ولمداد جف
وجف فيه لخيال …
…
عاد لخيال وظيفة وتلفزة
وثلاجة وطابليت وبورتابل
واوهام تتباع بين دلال ونصاب ..
سربيس يدي ويجيب
من عذاب لعذاب ..
كان لخيال فراشة من وردة لوردة
تطير
عاد لخيال انباح كلاب ..
مازال يا استاذي نتهجى خوفي
وصبعي للعالي ينادي بصواب ..
عاد صبعي يترعد
يتردد
يتلعثم يتخبا بين صباعو
يتكمش بين اوراق بالية
ويقول ياريت
ياريت
ترجع لسبورة ايامنا شباب ..
باقي طرشتك على خدي يا لالة عيشة *
توكض في التلفة ولغياب
باقي نشيدك يالسي النفاتي
ف ودني يرجعني
لصفي مستقيم
مربع يدي
والكلمة تجرني للكلمة
بفخ لحلام وانشاب ..
معزاتك يا مسيو سوكان *
منوضة قربالة وقشبال
ولحمة باليماكو لمجرورة بمهزلة لحبال ..
وااااااااااااااااااااااه ياشوق قتال
باقي ناقوسك يدق
يدق ..يدق …
وينادي : يالهاجر ساحة لفراح
امتى لوصال
امتى لوصال ؟ ..
دق ياناقوس وجلجل عالي
يكفي ما شاب من حلامنا
يكفى لعطاب ..
طباشيرنا يعود لونو
ويغير وجوهنا بطلة لحباب ..
لالة فطومة
ولالة عبوش
ولالة فخيتة بنت الكراب ..
وعلال لقرع
والتشاخ عليه
وشلا موازن
وكبيض التقشاب ..
…
…
داب الطباشير فينا وداب ..
وبانت لعياب ..
وشد ياعمري في بالخيبة والشيب
نشد فيك بالغمزة
واللمزة
والهمزة
وتقرقيب الناب ..
شعر : محمد نور الدين بن خديجة
مراكش المغرب
25/11/2015
*الأسماء الواردة هي وقفة اجلال لمدرسي الزمن الجميل .
*بعض الاسماء الواردة حقيقية وبعضها مفترض لاشخاص شعبيين عايشتهم مشاغبات طفولتي .
*مسيو سوكان : تدكرة لنص كنا ندرسه بالفرنسية
باليماكو : نص كدلك من كتاب قراءة فرنسي كنا ندرسه مطلع السبعينات .