بالدارجة
………
سوارت الربح
………………….
وأنا كبرت بيك
يا الكلمة
طاحت على راسي معانيك
وسط الكور ندور
ما عرفتش حدود سطور
نغمس قلام حزاني فسحور
والناس نايمة تخمم ففطور ..
الكانون بلا جمر
يتحير فعراه
وأنا درب وسخ
بلا صابون
ضحكة تحكيها عكايزالحوش
جيت مع طلوع الفجر
سبقت الشمس ..
كمرة البارح
كالت للنجوم :
ذاك السارح قريت فعينيه
سوارت الربح
ولفرساوي فقلب رسامي
نقش مخطوط
بلون جهر
يقول عشرين فبراير
قوس النصر..
يرمي يمين
يرمي شمال
طوب وحجر..
شق طريق بيمان بحر ..
وذاك الضر
بجنود القهر واقف
فطريق الشوك
ما يشوف غير كبالتو
وحدها تطيب .
أناري على شلا دراري
بصوت الحق تلالي
ضد لفساد
لي عشش فالبلاد
حتى دار ولادو
حتى دار حفادو
الله يحفظ ياكلو الرمل
يزرعو قاع لبحر
بالخوف والجذام
عبيد مشرطين لكدام
واللور..
لي فاتك بليلة
فوتو بجوج
راه علام الصح
وكلام الصح
ديرو فكتافك
وحدو يدوم .
وكلام لمخزن
صوف ودار ريحة
وتديه الجيحة
الله يستر .
الكلام إلى عمى سير وخليه
ما فيه فايدة
رفاقتو بالضر زايدة .
والكمرة ديك السمرة
كالت البارح للنجوم
وأنا السارح
قرات فعيني سوارت الربح …
…………..
مارس 2012
……………