واش يصبرني خيال الحنانة عني صد**
راح الفرح مع لميما راني في تاليه
كانت كي الساس مبني عالي ومشيد**
وجناني اخضر ونوارو ماليه
واش نقول اليوم راني نتفڨد**
ڨاعد كي المهبول ولي عقلو خاطيه
الحيط لي كان مبني راه تهد**
من بعدك يا اما ڨلبي واش يزهيه
نبكي عنها دموعي ودان على الحد**
وفراقك يا الحنانة واش ينسيه
بلاصتك يا لميما ما يملاها حتى حد**
ولي خلاتو الوالدة غير ربي ليه
النور لي كان عني راه خمد**
ولي في ضلمة كلامي يفهم معانيهف
نحسب اخصالها ياسر واش نعد**
نعد نجوم الليل وسماء وما فيه
خلات مشعال في جوفي ما يبرد**
لو نبكي عنك امطار ترابك ما نرويه
هذي حالت ليتيم حالو متمرمد**
كي لوعيل لي تڨصولو جنحيه
موالف كي الطير عالي مسترفد**
ولي تزغد من صايدا راهي ليه
الطير الحر يعلا في السماء ويبعد**
لكن ما يخلي العش لي تربا فيه
واه النار لي في ڨلبي ما تخمد**
ولا وناس لضري يواسه
هذا كلام جمال اليوم عنها وينشد**
ولي في ڨلبي بالابيات راني حاصيه
ارحمها ياربي في جاه طاها محمد**
وصلاة والسلام يا لحباب عليه
جمال لمخلطي