قصيدة زجلية للزجال محمد دومو تحت عنوان : “الكاس عل لبواب”.

الكاس عل لبواب.
(زجل مغربي) الشاعر محمد دومو

تفتحو لبواب ݣدام لمغاربة.
والشهوة عندهم فايتة لقياس..
المنتخب مستعد ال لمقاتلة.
والعين صبحات كتشوف فالكاس.
الملك بالفرحة شجع اللعابة.
وكلامو مفهوم ودروه فالراس.
بالطموح الأسود كلها منافسة.
والربان تابث وساير بالقياس.
البرتغال ماهي عقبة واعرة!
هزمناهم قبل ورافعين الراس.
التاريخ يتعاد ال كل لمغاربة.
يتكتب فوقت الحسم ݣدام الناس.
كونوا شداد يا ملوك الغابة.
راه الزئير كيخوف العساس.
بالثقة فالنفس تربحو المقابلة.
والاحتياط لازم يكون فالراس.
هذا كلام والصورة واضحة.
تقدموا بالشجاعة وجيبو الكاس.
بلعلمات غا يسقبلوكم لمغاربة.
بالزغريد فيوم الفرحة بلا نعاس.

-بقلم: الشاعر محمد دومو
-مراكش/ المغرب (07/12/2022)