تمنيتك تكون حلمت فياقي
على ذاك لعاهد باقي
تكون ليا مرايا
نجمة ضاوية ف سمايا
تكون لبيب
ضي لݣليب
تفك خبالي
فيك نلݣا حالي
وقت الحزة
تبدد لسعة لخوف
تبرد لهفة الجوف
تكون ليا ظهر
تكون ونيس لكبر
تداوي طعنات لغدر
تمنيتك تكون ليا
شمس
همس
حس
تروي من لكسدة لعروق
تحيي لخاطر وقت شروق
ؤ تخلي سعدي رشوق
تخلي خيالك ظلي
وقت لݣايلة
وقت الدموع السايلة
وقت هروب لغروب
وقت لبحر لشمس ركوب
تمنيتك تكون ليا دفا
جايد بلوفا
ولا تكون زهرة السعد
تفوح ما ورد
تمسد مفاصل لعمر
تمنيت تكون حنوط
كبة بلا خيوط
تونسني وقت نموت
ويكون شاهد لقبر
واحدمن لخوت
تمنيت ….تمنيت
ذيك لحلمة
تمسح الدمعة
ترجع للذات بسمة