بغيت نعرف .. ************** زجل للزجال عبد الرحمان سمتور

0 27

بغيت نعرف الليل
من الظلام
وكيف بهاتت الصورة ..
لقيت ظلام الليل
يلاغي بليل مظلام
وبشلا قبورة ..
ذاك اللي هناك
لبهيم بجيوشو الثقيلة
سيار ينصب خيامو
وهذيك النجوم
اللي كالوا لامعة
تلسع بالطاعة لو مغمورة ..
آحامية منو خيالو
وبالفرحة هازة علامو
تهتف بحياتو السودا
وكمرتنا مدعورة ..
تنادي ضي الشمس
م لعماق المضرورة ..
والحالة مقهورة ..
تلالي بلحزان
والحزن ثورة ..
وانت مقهور
ولعياط عليك
سيار يدور .

******

العاشق فينا الليل
انحاز للذياب
وراه ف نشوة منشورة ..
وانت تعشق فينا قنديل
مصيرك بين الضروس
والنياب
ولا هناك ف القاع مطمور
الحالة مقهورة ..
تلالي بلحزان
والحزن ثورة ..
وانت مقهور
ولعياط عليك
سيار يدور .

*****

الليل مظلل لهبال
بكديرتو تسممت شلا كداري
والتشكيلة
فوك راسك آالقاري
باش فاذنا ترقاع
باش فادتنا هضاري
من كثرة منابرهم المنثورة ..
طال الوقت بينا
بين كفوف البايع والشاري
والحالة مقهورة ..
تلالي بلحزان
والحزن ثورة ..
وانت مقهور
ولعياط عليك
سيار يدور .

******

ها مناجل
والارض للغير ممدودة ..
ها مطارق واكواخ سودة ..
ها طلاب
ف بيبان الفرحة مرصودة ..
تلامذ ورود ..
ودموع ع لخدود ..
تلالي بلحزان
والحزن ثورة ..
وانت مقهور
ولعياط عليك
سيار يدور .

*** من زجليات بداية التسعينات من القرن الماضي .

قد يعجبك ايضا

اترك رد